قازاقستاننىڭ بىرىككەن اراب امىرلىكتەرىندەگى ەلشىسىنىڭ كەڭەسشىسى بولعان ساكەن ماماشقا قاتىستى سوت ۇكىمى شىقتى، دەپ حابارلايدى bairaqmedia.kz.

ول قىلمىستىق كودەكستىڭ 110-بابى (ازاپتاۋ) بويىنشا ايىپتالدى. بۇل باپ 4 جىلدان 7 جىلعا دەيىن باس بوستاندىعىنان ايىرۋ جازاسىن قاراستىرادى.

سۋديا ساكەن ماماشتى كىنالى دەپ تانىپ، ورتاشا قاۋىپسىزدىك مەكەمەسىندە 6 جىلعا باس بوستاندىعىنان ايىرۋ جايلى شەشىم قابىلدادى. سونداي-اق سوت ونى ءبىرىنشى دارەجەلى كەڭەسشى ديپلوماتيالىق دارەجەسىنەن ايىرۋ تۋرالى شەشىم قابىلدادى.

«نەگىزسىز قىزعانىشتىڭ سالدارىنان سوتتالۋشى ماماش، مەملەكەتتىك قىزمەتكەر رەتىندە انت بەرگەن تۇلعا بولا وتىرىپ، 2019 جىلدان 2024 جىلعا دەيىنگى كەزەڭدە استانادا، كەيىننەن بىرىككەن اراب امىرلىكتەرىندە، ابۋ-دابيدە جابىرلەنۋشىگە جۇيەلى تۇردە كۇش كورسەتىپ، دەنەسىنىڭ ءارتۇرلى بولىگى مەن باسىنا جۇدىرىقپەن سوققى جاساعان. سوتتالۋشىنىڭ كىناسى جابىرلەنۋشىنىڭ، كۋالاردىڭ ايعاقتارىمەن، ساراپتاما قورىتىندىلارىمەن، بەينەجازبالارمەن، سكرينشوتتارمەن جانە ءىستىڭ باسقا دا ماتەريالدارىمەن دالەلدەندى. قىلمىستىق ءىس جۇرگىزۋ كودەكسىنىڭ 387-390، 393، 395-398، 401-402-باپتارىن باسشىلىققا الا وتىرىپ، سوت ماماش ساكەن تاشكەنبايۇلىن ق ر قىلمىستىق كودەكسىنىڭ 110-بابى 2-بولىگى 1-تارماعىندا كوزدەلگەن قىلمىستى جاساعانى ءۇشىن كىنالى دەپ تانىپ، وعان ورتاشا قاۋىپسىزدىك مەكەمەسىندە 6 جىل باس بوستاندىعىنان ايىرۋ جازاسىن تاعايىندادى»، – دەدى سۋديا ارتۋر ابدىقانوۆ.

ايتا كەتۋ كەرەك، ەكس-ديپلوماتتىڭ جۇبايى كارينا ماماشتىڭ 10 جىل بويى كۇيەۋى ۇرىپ-سوعىپ كەلگەن دەگەن مالىمدەمەسىنەن كەيىن ساكەن ماماش دۋبايداعى قىزمەتىنەن ەلگە قايتارىلعان ەدى.