دەنساۋلىق ساقتاۋ ءمينيسترى اقمارال ءالنازاروۆا مەديسينا قىزمەتكەرلەرىن سوققىعا جىعىپ، دارىگەرلەردىڭ ومىرىنە قاتەر توندىرگەن ازاماتتارعا ۇندەۋ جاريالادى، دەپ حابارلايدى bairaqmedia.kz
«سىزدەرگە پەرزەنتحانادا مەيىرگەر، بالالار اۋرۋحاناسىنىڭ قابىلداۋ بولىمىندە كەزەكشى جانە ورديناتور دارىگەر بولىپ جۇمىس ىستەگەن مامان رەتىندە ءۇن قاتقىم كەلەدى: مەديسينا قىزمەتكەرلەرىنە قارسى زورلىق-زومبىلىقتى توقتاتىڭىزدار! نەگىزسىز، اشۋ مەن ىزاعا بوي الدىرعان قاتىگەز ارەكەتتەر كەزىندە ءوز بالالارىڭىزدى، اتا-انالارىڭىزدى، جاقىندارىڭىزدى امان الىپ قالۋعا جان سالىپ جۇرگەن دارىگەر مەن مەيىرگەردىڭ بويىن بيلەگەن جان جاراسى مەن قورلىعى، قورعانسىزدىعى مەن ۇرەيىن ەلەستەتۋ مۇمكىن ەمەس. ءبىز تاعى دا قاراعاندى مەن قوستانايدا بولعان ەكى سوراقى جاعدايعا كۋا بولىپ وتىرمىز. قاراعاندىدا جەكە كلينيكانىڭ مەيىرگەرىنە شابۋىل جاسالدى. قوستاناي وبلىستىق اۋرۋحاناسىندا ۋرولوگيا ءبولىمىنىڭ جاس حيرۋرگى قاتىگەزدىكپەن سوققىعا جىعىلدى. پاسيەنت ءوز كەزەگىن كۇتكىسى كەلمەگەندىكتەن، دارىگەردى ۇرىپ، ەسىنەن تاندىرعان. ءقازىر دارىگەر رەانيماسيادا. جاعدايى – اۋىر. ادام ءومىرىن اراشالاپ جۇرگەن جانعا قول كوتەرۋ ءۇشىن ادام قانشالىقتى دەڭگەيدە قاتىگەز جانە مەيىرىمسىز بولۋى كەرەك؟» - دەدى مينيستر.
مينيستر بۇل – بۇكىل دەنساۋلىق ساقتاۋ جۇيەسىنە تونگەن تىكەلەي سوققى دەپ مالىمدەدى.
«بۇل – تەك ءبىر دارىگەرگە جاسالعان شابۋىل ەمەس. بۇل – ونداعان پاسيەنتتىڭ قاراۋسىز قالۋى، ونداعان وپەراسيانىڭ كەيىنگە شەگەرىلۋى. بۇل – بۇكىل دەنساۋلىق ساقتاۋ جۇيەسىنە تونگەن تىكەلەي سوققى. شابۋىل جاسالعان قابىلداۋ بولىمدەرى – ونسىز دا ءقاۋىپى جوعارى ايماقتار. وسىعان بايلانىستى مەديسينا قىزمەتكەرلەرىنە جاسالعان شابۋىل ءۇشىن جاۋاپكەرشىلىكتى كۇشەيتۋگە باعىتتالعان زاڭنامالىق وزگەرىستەر بيىلعى قىركۇيەكتە پارلامەنتكە ەنگىزىلەدى. مۇنداي ارەكەتتەردى تۇرمىستىق قاقتىعىس رەتىندە ەمەس، قوعامدىق قاۋىپسىزدىككە تونگەن ءقاۋىپ رەتىندە باعالاۋ قاجەت»، - دەدى ءالنازاروۆا.
وسى وقيعالاردان كەيىن ەلىمىزدەگى بارلىق مەديسينا مەكەمەلەرىندە كۇزەت كۇشەيتىلەدى.
«بارلىق مەديسينالىق ۇيىم بەينەباقىلاۋ جۇيەسىمەن، كۇزەتپەن جانە دابىل باتىرمالارىمەن قامتاماسىز ەتىلۋى ءتيىس. تاعى دا بارشاڭىزدى بارلىق دەڭگەيدە وركەنيەتتى قارىم-قاتىناس مادەنيەتىن ساقتاۋعا شاقىرامىن. ءبىز بالالارعا جاس كەزىنەن مەديسينا قىزمەتكەرلەرىنىڭ ەڭبەگىن قۇرمەتتەۋدى، العىس ايتۋ مادەنيەتىن ۇيرەتۋىمىز كەرەك. جاپا شەككەن ارىپتەسىمىزدىڭ ءومىرىن ساقتاۋ ءۇشىن دەنساۋلىق ساقتاۋ مينيسترلىگى بارلىق قاجەتتى ءارى باتىل شارا قابىلدايتىن بولادى»، - دەدى مينيستر.
اقمارال ءالنازاروۆا جۇمىس كەزىندە زارداپ شەككەن دارىگەردىڭ سانيتاريالىق اۆياسيامەن ۇلتتىق شۇعىل مەديسينانى ۇيلەستىرۋ ورتالىعىنا جەتكىزىلىپ، ەم قابىلدايتىنىن ايتتى.
