باعاناشىلداعى اپاتتى دەپ تانىلعان بالالار ءۇيى ورنالاسقان جەر تەلىمىنىڭ كىمگە بەرىلەتىنى بەلگىلى بولدى، دەپ حابارلايدى bairaqmedia.kz
الماتى وبلىسىنىڭ اكىمى مارات سۇلتانعازييەۆتىڭ ايتۋىنشا، كوشىرۋ جۇمىستارى اياقتالعاننان كەيىن الماتى قالاسى، بوستاندىق اۋدانى، باعاناشىل شاعىناۋدانى، سىرعابەكوۆ كوشەسى، 22 مەكەنجايىنداعى جالپى اۋدانى 2،5 گەكتاردى قۇرايتىن جەر ۋچاسكەسى الماتى قالاسىنىڭ كوممۋنالدىق مەنشىگىنە بەرىلمەك.
ەسكە سالايىق، بۇعان دەيىن الماتى قالاسىنداعى باعاناشىل ىڭقشاماۋدانىنداعى بالالار ءۇيىن قونايەۆقا كوشىرۋ ماسەلەسى قىزۋ تالقىعا تۇسكەن بولاتىن. ونداعى ۇل-قىزدار بۇعان قارسى شىقتى.
الايدا، مارات سۇلتانعازييەۆتىڭ ايتۋىنشا، ءقازىر بۇل عيماراتتى تەحنيكالىق سەبەپتەرگە بايلانىستى ودان ءارى پايدالانۋ مۇمكىن ەمەس ەكەن. 2020 جىلدىڭ 13 ساۋىرىندەگى قورىتىندىعا سايكەس، نىسانداعى نەگىزگى كورپۋستاردىڭ، ونىڭ ىشىندە ۇيىقتاۋ بولمەلەرى، اسحانا، سپورت زالى، مونشا جانە كىر جۋۋ بلوگىنىڭ جاعدايى كۇردەلى جوندەۋدى قاجەت ەتەتىنى انىقتالعان.
قورىتىندىدا عيماراتتى تەك قۇرىلىمدىق بولىكتەرىن كەشەندى نىعايتقاندا عانا پايدالانۋعا بولاتىنى جازىلعان. وسىعان بايلانىستى مەكەمە اكىمشىلىگى 2020 جىلعى 17 ساۋىرىندە ءتيىستى بيۋدجەتتىك ءوتىنىم بەردى. الايدا وبلىستىق ءماسليحات تاراپىنان كۇردەلى جوندەۋگە قاراجات ءبولۋ تۋرالى شەشىم قابىلدانعان جوق. تەحنيكالىق قورىتىندىنىڭ جارامدىلىق مەرزىمى ءۇش جىلدى قۇرايتىن بولعاندىقتان، 2024 جىلى نىسانعا قايتا ساراپتاما جۇرگىزىلدى. «استاناقۇرىلىسسەرۆيس» ءجشس-نىڭ زەرتتەۋ قورىتىندىسى بويىنشا عيمارات تولىقتاي پايدالانۋ ءۇشىن جارامسىز دەپ تانىلدى، - دەدى الماتى وبلىسىنىڭ اكىمى مارات سۇلتانعازييەۆ.
وسىعان بايلانىستى تاربيەلەنۋشىلەردى كەزەڭ-كەزەڭىمەن قونايەۆ قالاسىندا ورنالاسقان جاڭا بالالار ۇيىنە كوشىرۋ پروسەسى باستالعان. جاڭا نىسان 180 ورىنعا ارنالعان، جەكە ينۆەستيسيالار ەسەبىنەن سالىنعان جانە مەملەكەتتىك مەنشىككە بەرىلگەن. بۇل مەكەمە اتا-اناسىنىڭ قامقورلىعىنسىز قالعان بالالارعا ارنالعان ۇيىمدارعا قويىلاتىن زاماناۋي تالاپتارعا تولىق ساي كەلەدى دەيدى اكىم.
ال، ەسكى بالالار ءۇيى عيماراتىنىڭ اۋماعى الماتى قالاسىنىڭ كوممۋنالدىق مەنشىگىنە بەرىلەدى.
بالالار ءۇيى ورنالاسقان جەردىڭ ماقساتتى پايدالانۋ ءتۇرى وزگەرىسسىز قالادى. بۇل ماسەلەنىڭ ءارى قارايعى شەشىمى الماتى قالاسى اكىمدىگىنىڭ قۇزىرىندا بولادى. جەر ۋچاسكەسىن پايدالانۋ ماسەلەسى قولدانىستاعى زاڭناماعا ساي، قوعام پىكىرىن ەسكەرە وتىرىپ جانە الەۋمەتتىك باعىتتىلىعىن ساقتاي وتىرىپ قارالادى، - دەدى مارات سۇلتانعازييەۆ.
