جەلى قولدانۋشىسى استاناداعى كافەنىڭ بىرىندە سۇمدىق جايتقا تاپ بولعان. ونىڭ ايتۋىنشا، عيمارات ىشىندەگى ارنايى ويىن الاڭىندا جۇرگەن بالاسىنىڭ تابانىنا مەديسينالىق ءشپريستىڭ ينەسى كىرىپ كەتكەن، دەپ حابارلايدى Azattyq Rýhy.

«كەشكى ساعات 22:00 مەن 23:00 ارالىعىندا وتباسىمىزبەن جانىبەك تارحان كوشەسى، 6ب مەكەنجايىنداعى SF شاۋرما فۋد كافەسىنە باردىق. ەكى بالامىزعا الاڭدا ويناۋ ءۇشىن كىرۋ اقىسىن تولەدىك. سول جەردە ۇلىمنىڭ تابانىنا بۇگىلگەن مەديسينالىق شپريس كىرىپ كەتىپ، جاراقات الدى. ينەنى بەلگىسىز بىرەۋ تاستاپ كەتكەن. بالامنىڭ دەنساۋلىعىنا قاتتى الاڭدايمىن، ينەنى الدەكىم ادەيى تاستاپ كەتۋى مۇمكىن. ەندى بالام 6 اي بويى ينفەكسيونيستكە قارالۋ كەرەك»، - دەدى الاڭداعان انا.

ونىڭ سوزىنشە، وقيعا ورنىنا جەدەل جاردەم مەن پوليسيا شاقىرىلعان، ءبىراق ءالى كۇنگە دەيىن پوليسيا تاراپىنان ەش ارەكەت جاسالماعان كورىنەدى.

ول ينەنىڭ فوتوسىن، مەديسينالىق انىقتامالاردى جاريالادى.

وسىعان قاتىستى اگەنتتىك ءتىلشىسى قالالىق قوعامدىق دەنساۋلىق ساقتاۋ باسقارماسىنا ساۋال جولدادى.

«پاسيەنتتى №2 كوپسالالى قالالىق بالالار اۋرۋحاناسىنىڭ قابىلداۋ بولىمىندە دارىگەرلەر تەكسەردى. اۋىر جاراقاتتار انىقتالماعاندىقتان، بالا تۇرعىلىقتى مەكەنجايى بويىنشا امبۋلاتوريالىق ەم الۋعا جىبەرىلدى»، – دەلىنگەن قوعامدىق دەنساۋلىق ساقتاۋ باسقارماسى حابارلاماسىندا.