بۇگىن تۇنگى ساعات ۇشتەن باستاپ استاناداعى بايقوڭىر اۋدانىندا ورنالاسقان «بيگ شانحاي» بازارىنىڭ ءۇش قاباتتى عيماراتىندا بولعان ءىرى ورتپەن توتەنشە جاعدايلار دەپارتامەنتىنىڭ قىزمەتكەرلەرى كۇرەسىپ جاتىر. ءورت تاڭعى 07:10-دا وقشاۋلانعانىمەن، ءسوندىرۋ جۇمىسى ءالى دە جالعاسىپ جاتىر، دەپ حابارلايدى Azattyq Rýhy.
ق ر توتەنشە جاعدايلار مينيسترلىگىنىڭ باسپا ءسوز قىزمەتىنىڭ مالىمەتىنشە، العاشقى بولىمشەلەر وقيعا ورنىنا كەلگەن ساتتە ءورت ەداۋىر ءورشىپ كەتكەن. عيماراتتىڭ قابات ارالىق جابىندارى جارتىلاي قۇلاعان، قالىڭ ءتۇتىن باسقان. سونىمەن قاتار، ءورتتىڭ قوسالقى گالەرەيا ارقىلى كورشىلەس ورنالاسقان «وردا» بازارىنا تارالۋ ءقاۋپى بولعان.
وقيعا ورنىندا ءورت ءسوندىرۋ شتابى قۇرىلىپ، ۇزدىكسىز سۋ بەرۋ ۇيىمداستىرىلدى، بىرنەشە ءورت ءسوندىرۋ قۇرىلعىسى جۇمىس ىستەپ جاتىر. ورتكە جوعارى دارەجەلى رانگ بەرىلگەن. قازا تاپقاندار مەن زارداپ شەككەندەر جوق، 112 قىزمەتىنە ءتيىستى حابارلامالار تۇسپەگەن.
«بازار اكىمشىلىگى ءورت تۋرالى حابارلاماعان. ءورتتى ءبىرىنشى جانە ءۇشىنشى قابات تەرەزەلەرىنەن شىققان قويۋ قارا ءتۇتىندى بايقاعان ءورت ءسوندىرۋ ءبولىمىنىڭ قىزمەتكەرلەرى انىقتاعان»، – دەپ حابارلادى تجم.
قازىرگى ۋاقىتتا ءورتتى تولىق جويۋ بويىنشا جۇمىس جالعاسۋدا – وت وشاقتارىن سۋمەن ءسوندىرۋ جانە قۇرىلىمداردى بولشەكتەۋ جۇرگىزىلۋدە.
ءورتتىڭ كولەمى مەن سەبەبى ناقتىلانۋ ۇستىندە. تولىق اقپارات بارلىق جۇمىس اياقتالعان سوڭ جاريالانادى.
ورتكە بايلانىستى استانادا «بيگ شانحاي» بازارىنداعى ساۋدا نۇكتەلەرى زارداپ شەككەن كاسىپكەرلەر مەن قىزمەتكەرلەرگە كومەك كورسەتۋ ءۇشىن ارنايى ءتۇسىندىرۋ شتابى جۇمىسىن باستادى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.
شتاب الاش تاسجولى، 30ا مەكەنجايىنداعى «Anuar» سۋپەرماركەتىنىڭ 3-قاباتىندا ورنالاسقان.
«شتاب جالعا الۋشىلارعا، كاسىپكەرلەر مەن بازار قىزمەتكەرلەرىنە كەڭەس بەرىپ، قۇقىقتىق، قارجىلىق جانە وزگە دە ماسەلەلەر بويىنشا اقپارات ۇسىنۋدا. ءاربىر ادام كەلىپ، وزەكتى مالىمەت الىپ، ءارى قارايعى ارەكەتتەرگە قاتىستى كەڭەس الا الادى»، – دەلىنگەن اكىمدىك حابارلاماسىندا.
وقيعا ورنىندا تجد، پوليسيا دەپارتامەنتى، اكىمدىك، ينۆەستيسيالار جانە كاسىپكەرلىكتى دامىتۋ باسقارماسى مەن بازار اكىمشىلىگىنىڭ وكىلدەرى كەزەكشىلىك ەتىپ، كەڭەس بەرۋدە.
بيلىك وكىلدەرى قالا تۇرعىندارىن تەك رەسمي اقپارات كوزدەرىنە سەنۋگە شاقىرادى.
