اقكول اۋدانىندا 14 جاستاعى ۇلىنا ورتاشا اۋىرلىقتاعى دەنە جاراقاتىن كەلتىرگەن ايەلگە سوت ۇكىمى شىقتى، دەپ حابارلايدى bairaqmedia.kz.

اقمولا وبلىستىق سوتىنىڭ مالىمەتىنشە، وقيعا 2024 جىلدىڭ قىركۇيەگىندە بولعان. اناسى بالاسىنا رۇقساتسىز مۋزىكالىق كولونكانى الىپ كەتكەنى ءۇشىن ۇرىسىپ، سودان جانجال شىققان.

اشۋعا بۋلىققان ايەل ءۇيدىڭ اۋلاسىندا تۇرعان كۇرەكتى الىپ، ۇلىن قورقىتپاق بولىپ، ونى بالاسىنا قاراي سەرمەپ قالعان. بالا ءوزىن قورعاۋ ءۇشىن قولىن كوتەرگەندە كۇرەك ساۋساقتارىنا ءتيىپ، جاراقات العان. 

ساراپتاما ونىڭ ساۋساعىنىڭ بۋىن سۇيەگى جابىق تۇردە سىنىپ، ازداپ ىعىسقانىن انىقتادى.

سوتتا ايەل كىناسىن تولىق مويىنداپ، بالاسىنا ادەيى زيان كەلتىرگىسى كەلمەگەنىن، تەك قورقىتقىسى كەلگەنىن ايتتى. 

ايتۋىنشا، جانجالداسۋ كەزىندە ۇلى وعان بەيادەپ سوزدەر ايتقان.

"ق ر قىلمىستىق كودەكسىنىڭ 107-بابى 2-بولىگى 3 جانە 8-تارماقتارى بويىنشا (كامەلەتكە تولماعانعا ورتاشا اۋىرلىقتاعى دەنە جاراقاتىن قاساقانا كەلتىرۋ) ايەل كىنالى دەپ تانىلدى"، - دەپ جازىلعان حابارلامادا.

سوت ايىپتالۋشىنىڭ شىن وكىنىپ وتىرعانىن جانە بۇرىن سوتتى بولماعانىن ەسكەرىپ، 1 جىلعا شارتتى تۇردە باس بوستاندىعىنان ايىرۋ جازاسىن تاعايىندادى.