Ішкі істер министрлігі жедел-профилактикалық іс-шара өткізіп, екі күн ішінде іздеуде жүрген 280 қылмыскерді ұстады.

polisia.kz таратқан ақпаратқа сай кісі өлтіргені үшін – 9, денсаулыққа ауыр зиян келтіргені үшін – 4, қарақшылық шабуыл жасаған – 5, тонау бойынша – 7, есірткі қылмысы үшін – 19 күдіктінің қолына кісен салынды. 

Республикадан тыс жерлерде 33 қылмыскер құрықталып, ал басқа мемлекеттердің сұрауымен 145 адам қамауға алынды. Арменияның Ноемберян ауданының аумағында 36 жастағы Қазақстан азаматы ұсталды. Ол қыркүйек айының соңында Петропавлда қала тұрғынына пышақ жарақатын салып, қастандық жасаған. Павлодар облысы полициясының жедел-іздестіру тобы Ресейдіңң Орел қаласында 42 жастағы қазақстандықты ұстады. Қаскөй 2017 жылы серіктестіктің біріне дизель отынын жеткізуге уәде беріп, 50 млн теңгені үптеп кеткен.  

Алматы полициясы Ташкент облысының МІІБ-мен іздеуде жүрген 28 жастағы Өзбекстан азаматын ұстады. Әйел 2015 жылдың мамыр айында өзінің кәмелетке толмаған қызын өлтірген. Қазақстан ІІМ Интерполының сұрауы бойынша Германияның Нюрнберг қаласында еліміздің 42 жастағы азаматы ұсталды. Ол наурыз айының соңында астық жеткізуге уәде беріп, Павлодарда шетелдіктің 244 мың долларын жымқырған. Абай облысының ПД қызметкерлері іздеуде жүрген семейлік тұрғындарды қаланың өзінде құрықтады. Олар 2021 жылы металл зауытынан құрамында алтыны бар материалды ұрлап әкеткен. Сонымен қатар жүргізілген жұмыс барысында полиция қызметкерлері хабар-ошарсыз кеткен 53 адамның орналасқан жерін анықтады, - деп жазды polisia.kz