Úndistanda naızaǵaıdan 33 adam qaza tapty jáne ondaǵan adam jaralandy. Bul jaǵdaı birneshe kún boıy jalǵasqan mýsondyq jaýyn-shashyn men daýyl kezinde bolǵan, dep habarlady bairaqmedia.kz.
Tabıǵı apattarǵa qarsy kúres jónindegi memlekettik basqarmanyń málimetinshe, Bıhar shtatynda adamdardyń qaza tabýy sársenbi men beısenbi aralyǵyndaǵy kúshti daýyldar kezinde bolǵan. Qaza tapqandardyń basym bóligi — ashyq aspan astynda jumys istegen fermerler men jumysshylar.
Shtattyń keıbir aımaqtarynda aldaǵy kúnderi nóser jaýyn men naızaǵaı boljanyp otyr.
Bıhar shtatynyń tabıǵı apattar basqarmasynyń mınıstri Vıdjaı Kýmar Mandaldyń aıtýynsha, sheneýnikterge saqtyq sharalaryn kúsheıtý tapsyrylǵan.
Shtat úkimeti naızaǵaı saldarynan qaza tapqandardyń otbasylaryna 4 mıllıon rýpıı (shamamen 4 600 AQSH dollary) kóleminde ótemaqy tóleıtinin habarlady.
Bıhar bıliginiń málimetinshe, 2024 jyly naızaǵaıdan keminde 243 adam qaza tapqan, al 2023 jyly bul kórsetkish 275 adamdy quraǵan.
Úndistannyń shyǵys aımaqtary, sonyń ishinde Bıhar shtaty, jyl saıyn mýson maýsymynda sý tasqynyna ushyraıdy. Bul kezeńde ondaǵan adam qaza taýyp, júzdegen myń turǵyn evakýasıalanady.
