2024 jyldyń 3 qazanynan 4-ine qaraǵan túni Talǵar qalasynda «Qamajaı» dúkeni mańynda bolǵan jappaı tóbeles aýyr qylmysqa ulasty. Sot prosesinde prokýror oqıǵanyń tolyq hronologıasyn baıandap, 9 aıyptalýshyǵa taǵylǵan aıyptarmen tanystyrdy, dep habarlaıdy Bairaqmedia.kz.
Oqıǵanyń bastalýy
23:22-de mas kúıdegi Darhan Áskentaı «Qamajaı» dúkenine kirip, syra men temeki alǵan. Aqysyn kámeletke tolmaǵan tanysy Áskerbekke aýdartqan, alaıda ol tek 1 teńge aýdaryp, chekti jibergen. Bul kezde satýshy Nurymovqa 1000 teńge qolma-qol berilgenimen, qaryz daýly bolyp qalǵan.
23:52-de dúkende otyrǵan Sherzat Polat Áskentaıdy ákesine qaraı aıtylǵan balaǵat sózder úshin uryp jibergen. Nurymov ulyn sabyrǵa shaqyryp, Áskentaıdan keshirim surap, zalaldy óteıtinin aıtqan. Biraq Áskentaı ony elemeı, dosy Nurbol Toqtaýbaevty kómekke shaqyrǵan.
Qaqtyǵystyń órshýi
00:06-da N.Toqtaýbaev pen Ysqaq dúkenge kelip, jaǵdaıdy surastyryp jatqanda, Nurymov óz baýyry Ǵaıypbaevty shaqyrǵan. Ǵaıypbaev kelgen soń inisi úshin keshirim suraǵanymen, Áskentaı men Toqtaýbaev onymen sózge kelip qalǵan. Keıinirek tólem týraly túsinispeýshilik sheshilip, Toqtaýbaev dúkenge qaıta kelip, 1,5 myń teńge aýdarǵan.
Alaıda osy sátte Nurymov Áskentaıǵa pyshaqpen umtylǵanymen, uly ony toqtatqan.
Qarý men pyshaqpen qarýlanǵan toptyń kelýi
Osy ýaqytta Nurbol Toqtaýbaev óziniń týǵan baýyry Azamat Toqtaýbaev pen tanystary — Abzal Shynasyl, Ravıl Sákıev, Shyńǵys Belǵojaev, Nurqıas İlıasovtyń qaladaǵy kafelerdiń birinde otyrǵanyn bilip, olardy «Qamajaı» dúkeni mańyna shaqyrady. Belsendi áreketke kóshken Belǵojaev, Shynasyl, Sákıev, İlıasov jáne A.Toqtaýbaev ózara sóz baılasyp, pyshaqtardy daıyndap, masań kúıde oqıǵa ornyna — Belǵojaev basqarǵan kólikpen bet alady. Olarmen birge qyzdar — Nurbekova men Jaqsygeldi de bolǵan. Bul toptyń artynan Shynasyl jeke kólikpen — tanysy Áshirbaevtyń basqarýyndaǵy avtokólikpen erip otyrǵan.
00:34-te. Sherzat Polattyń shaqyrýymen onyń dostary dúken aldyna jaldamaly kólikpen jetedi. Osy kezde syra alý maqsatymen Qalıahmet, Ábdirqadir jáne Muratov dúken ishine kiredi.
00:38-de. Belǵojaev kóligimen Sákıev, İlıasov, A.Toqtaýbaev jáne qyzdar — Nurbekova men Jaqsygeldini dúken aldyna alyp keledi. Artynan Shynasyl da jetip, ony jetkizip tastaǵan Áshirbaev oqıǵa ornynan ketip qalǵan.
Osy ýaqytta dúken aldynda Sherzat Polat, onyń aǵasy Nurqanat Ǵaıypbaev jáne dostary turǵan. Qarsy tarapta — Nurbol Toqtaýbaev, Darhan Áskentaı jáne Ysqaq bolǵan. Dúken ishine kirip-shyǵyp júrgen — Sherzattyń ákesi Nurymov, al dúken ishinde Qalıahmet bolǵan.
Qaqtyǵys Shynasyldyń Sherzattyń kámeletke tolmaǵan dosyna birinshi bolyp soqqy berýimen bastalǵan. Tóbelestiń bastalǵanyn ańǵarǵan Sherzat Polattyń dostary oqıǵa ornynan qashqan.
Osy kezde dúken ishinde aıqaı-shýdy estigen Nurymov kasadan pyshaq alyp, syrtqa shyqpaq bolady. Biraq Qalıahmet ony qolynan ustap, bógemek bolǵan. Alaıda Belǵojaev dúken esigin aıaqpen teýip, Nurymovty qaıta ishke kirgizip jiberedi. Sol sátte dúkenniń soltústik-batys buryshyndaǵy aǵash janynan bireý 16 kalıbrli ańshylyq myltyqpen qarsy topqa qaraı oq atqan. Alaıda oq eshkimge tımegen.
00:42-de. Sherzattyń anasy Bıshımbıeva men ájesi Kadırova jaldamaly kólikpen oqıǵa ornyna jetedi. Sol ýaqytta Shynasyl ózimen alyp kelgen asúı pyshaǵyn paıdalanyp, Sherzat pen onyń aǵasy Ǵaıypbaevty óltirý nıetimen áreket etken. Shynasyl kámeletke tolmaǵan Sherzat Polattyń sol jaq júrek tusyna as pyshaǵyn suǵyp alady.
Osy sátte Sákıev Ǵaıypbaevqa áýeli bótelke laqtyrǵan, biraq ol tımegen, keıin qolmen jáne basqa quraldarmen urǵan. Qalıahmet te Ǵaıypbaevty urýǵa tyrysqan. A.Toqtaýbaev pen İlıasov oǵan birneshe ret pyshaq sermegenimen, soqqylar ótpegen. Dúken ishinen shyǵyp kele jatqan Nurymovty sottalýshylardyń biri bótelkemen betinen uryp jiberedi.
Dál osy ýaqytta dúkenge qaraı kele jatqan Sherzattyń ájesi Kadırovany Shynasyl ıterip qulatqan. Artynsha balasyna jetpek bolǵan Bıshımbıevany Shynasyl men İlıasov qolynan ustap, jibermeı qoıǵan.
Sol kezde Ǵaıypbaev inisiniń «Nurqanat aǵa, maǵan birdeńe suǵyp aldy» degen daýysyn estip, oǵan júgirip barǵan. Jaraqatty kórip, «Skoraıa» dep kómek shaqyrǵan.
Osy sátte anasy Bıshımbıeva balasyna jetip, ony qushaqtap otyrǵan kezde Belǵojaev esh nársege qaramaı, Polatty basynan teýip, báki pyshaǵynyń sabymen birneshe ret soqqy jasaǵan. İlıasov bolsa jerde jatqan ańshylyq myltyqty alyp, onyń sabymen Sherzatty urýǵa tyrysyp, soqqynyń birin anasyna tıgizgen.
Onymen qoımaı, Áskentaı, Belǵojaev, A.Toqtaýbaev, Sákıev jáne İlıasov — bári birdeı jerde jatqan Ǵaıypbaev pen Polatty aıaq-qoldarymen aıaýsyz uryp-soqqan.
Oqıǵa nemen aıaqtaldy?
01:02–01:04 aralyǵy. Shynasyl Ǵaıypbaevty óltirý maqsatynda onyń jambas tusyna pyshaq suǵyp alady. Dál osy sátte Sákıev te onyń oń jaq jambasyna eki ret pyshaq suqqan. Osy shabýyldar saldarynan Ǵaıypbaev esinen tanyp qalǵan. Shabýyldaýshylar ony óldi dep oılap, soqqy jasaýdy toqtatqan.
Tóbeles barysynda Ǵaıypbaevtyń telefony jerge túsip qalǵan. Quny 220 myń teńge turatyn qurylǵyny A.Toqtaýbaev oqıǵa ornynan jasyryn túrde alyp ketken.
Sońynda barlyq kúdiktiler kólikke minip, oqıǵa ornynan qashyp ketken. Ysqaq jeke kóligimen olardyń artynan ilesip ketken.
Qazir Abzal Shynasyl, Ravıl Sákıev, Shyńǵys Belǵojaev, Darhan Áskentaı, Nurbol jáne Azamat Toqtaýbaevtar, Nurqıas İlıasov, Dıdar Qalıahmet, Dýman Ysqaq QR QK 99-baby («Adam óltirý»), 293-baby («Buzaqylyq»), 188-baby («Urlyq») jáne basqa da baptar boıynsha jaýapqa tartylyp jatyr.
