Qazaqstandyq blogerdiń Qytaıda túsirgen prank vıdeolary úlken rezonans týdyrdy, – dep habarlaıdy Aikyn.kz. Qytaı halqy blogerdiń áreketin zańsyz dep taýyp, ony jaýapqa tartýdy talap etýde.
Qytaıda túsirilgen vıdeolar nelikten daý týǵyzdy?
Sońǵy kúnderi qytaılyq áleýmettik jeliler men jańalyqtar portaldarynda qazaqstandyq ınflúenserdiń áreketi qyzý talqylanýda. Jergilikti BAQ-tyń málimetinshe, bloger Qytaıda «urlyq joq» degen sózge senbeı, ózinshe «tekserip» kórmek bolǵan. Ol Gýanchjoý men Shanhaıda júrip, qurbysynyń qaltasynan baıqatpaı telefonyn alyp, ony ótip bara jatqan qytaı azamatynyń qolyna ustatady. Sosyn dosyna telefonyńdy «myna adam urlady» dep kórsetedi. Sonymen qatar, er adamdarǵa janasyp, qolynan ustap, ıyǵyna súıenip, aıaǵyna tıisip, olardyń reaksıasyn vıdeoǵa túsirgen.
Qytaı azamattary narazylyq bildirýde
Sohu.com, news.qq.com jáne Sina.com.cn sıaqty iri qytaılyq medıa platformalar bul áreketterdi qoǵamdyq tártipke qaıshy, qytaılyqtardyń meıirimdiligin teris pıǵylda kórsetý dep baǵalady. Vıdeodaǵy qarapaıym azamattardyń ar-namysy taptaldy, Qytaıdyń halyqaralyq ımıjine keri áser etti dep ataǵan.
Qytaı zańdary ne deıdi?
Qytaı zańnamasyna sáıkes, jalǵan aıyp taǵý, qoǵamdyq tártipti buzý, jeke tulǵalardyń ruqsatynsyz vıdeo taratý jáne kópshilik aldynda qorlaý qatań jazalanady.
Zańger Han Dýnándiń aıtýynsha, mundaı áreket ákimshilik aıyppulǵa nemese qamaýǵa alý men deportasıaǵa deıin aparýy múmkin.
Jábirlenýshi azamattar blogerden keshirim suraýdy, moraldyq shyǵyn óteýdi, vıdeo materıaldardy óshirýdi talap etýge tolyq quqyly.
Gýanchjoý polısıasy iske aralasty
Qytaıdyń tanymal 163.com portalynyń jazýynsha, Gýanchjoý qalasynyń polısıasy turǵyndardan túsken aryzdar negizinde blogerdiń áreketine qatysty tekserý jumystaryn bastaǵan.
Bul oqıǵa – shetelde kontent túsiretin blogerler men ınflúenserler úshin úlken sabaq. Qandaı elde bolsyn jergilikti zańǵa baǵyný, mádenıet pen dástúrge qurmetpen qaraý, qoǵamdyq tártipti saqtaý — basty qaǵıda bolyp qala beredi.
Qytaı BAQ-tary ǵalamtordaǵy tanymaldyq úshin bulaı qoǵamdy qorlaýǵa bolmaıtyny aıtýda.
