Áleýmettik jelide qazaq halqynyń ar-namysyna tıetin jazba qaldyrǵan Qaraǵandy turǵyny Alıka Mýhamadıevaǵa qatysty Bas prokýrorǵa aryz tústi, dep jazady Ertenmedia.

Bul týraly tanymal jýrnalıs Aıbar Oljaı habarlap, bútin bir ultty kemsitken jazba Qylmystyq kodekstiń 174-babymen («Áleýmettik, ulttyq, rýlyq, násildik arazdyqty qozdyrý») saralanýy múmkin ekenin eskertti.

Instagram paraqshasynda jarıalanǵan jazbada Mýhamadıeva qazaq tilinde sóıleýdi talap etetinderdi mazaq etip, memlekettik tildi «polýkalbıtskıı dıalog» dep kelemejdegen. Sonymen qatar, «Qazaqstan nemen tanymal?» degen saýalǵa «mambetamı» dep jaýap berip, eldegi tıtýldy ulty kópshilik aldynda kópe-kórineý kemsitken.

Aıbar Oljaı bul máselege ózi ǵana emes, birneshe adamnyń shaǵym túsirgenin, sol sebepti istiń aýqymy keńeıip, statýsy joǵarylaıtynyn jetkizdi. 

Qazirgi ýaqytta Bas prokýratýranyń ekstremızmmen kúres bólimi materıaldy qarastyrýda, tekserý barysynda zań buzýshylyqtyń belgileri rastalsa, is Qaraǵandy oblystyq polısıa departamentine joldanbaq.

Jelidegi jurt óz kezeginde Muhamadıevany Qazaqstannan deportasıalaýdy talap etýde. 

Eger kinási dáleldense, ol 2 jyldan 7 jylǵa deıin bas bostandyǵynan aıyrylýy múmkin.  

"Senimdi derekkózdiń habarlaýynsha, Alıka Mýhamadıeva Qaraǵandy polısıa departamentine tergeýge shaqyryldy. Qazirgi mınýtta tergeýshi aldynda otyr. QR Qylmystyq Kodeksiniń 174 baby iske qosylatyn syńaıly. "Ádiletti Qazaqstan" Zań men Tártip qaǵıdasyn der kezinde ornatýda jáne bárimizge jazar aldynda, ister aldynda, sóıler aldynda oılaný kerek", - dep jazdy Oljaev.