Baǵanashyldaǵy apatty dep tanylǵan balalar úıi ornalasqan jer teliminiń kimge beriletini belgili boldy, dep habarlaıdy bairaqmedia.kz
Almaty oblysynyń ákimi Marat Sultanǵazıevtiń aıtýynsha, kóshirý jumystary aıaqtalǵannan keıin Almaty qalasy, Bostandyq aýdany, Baǵanashyl shaǵynaýdany, Syrǵabekov kóshesi, 22 mekenjaıyndaǵy jalpy aýdany 2,5 gektardy quraıtyn jer ýchaskesi Almaty qalasynyń komýnaldyq menshigine berilmek.
Eske salaıyq, buǵan deıin Almaty qalasyndaǵy Baǵanashyl yńqshamaýdanyndaǵy balalar úıin Qonaevqa kóshirý máselesi qyzý talqyǵa túsken bolatyn. Ondaǵy ul-qyzdar buǵan qarsy shyqty.
Alaıda, Marat Sultanǵazıevtiń aıtýynsha, qazir bul ǵımaratty tehnıkalyq sebepterge baılanysty odan ári paıdalaný múmkin emes eken. 2020 jyldyń 13 sáýirindegi qorytyndyǵa sáıkes, nysandaǵy negizgi korpýstardyń, onyń ishinde uıyqtaý bólmeleri, asqana, sport zaly, monsha jáne kir jýý blogynyń jaǵdaıy kúrdeli jóndeýdi qajet etetini anyqtalǵan.
Qorytyndyda ǵımaratty tek qurylymdyq bólikterin keshendi nyǵaıtqanda ǵana paıdalanýǵa bolatyny jazylǵan. Osyǵan baılanysty mekeme ákimshiligi 2020 jylǵy 17 sáýirinde tıisti búdjettik ótinim berdi. Alaıda oblystyq máslıhat tarapynan kúrdeli jóndeýge qarajat bólý týraly sheshim qabyldanǵan joq. Tehnıkalyq qorytyndynyń jaramdylyq merzimi úsh jyldy quraıtyn bolǵandyqtan, 2024 jyly nysanǵa qaıta saraptama júrgizildi. «Astanaqurylysservıs» JSHS-niń zertteý qorytyndysy boıynsha ǵımarat tolyqtaı paıdalaný úshin jaramsyz dep tanyldy, - dedi Almaty oblysynyń ákimi Marat Sultanǵazıev.
Osyǵan baılanysty tárbıelenýshilerdi kezeń-kezeńimen Qonaev qalasynda ornalasqan jańa balalar úıine kóshirý prosesi bastalǵan. Jańa nysan 180 orynǵa arnalǵan, jeke ınvestısıalar esebinen salynǵan jáne memlekettik menshikke berilgen. Bul mekeme ata-anasynyń qamqorlyǵynsyz qalǵan balalarǵa arnalǵan uıymdarǵa qoıylatyn zamanaýı talaptarǵa tolyq saı keledi deıdi ákim.
Al, eski balalar úıi ǵımaratynyń aýmaǵy Almaty qalasynyń komýnaldyq menshigine beriledi.
Balalar úıi ornalasqan jerdiń maqsatty paıdalaný túri ózgerissiz qalady. Bul máseleniń ári qaraıǵy sheshimi Almaty qalasy ákimdiginiń quzyrynda bolady. Jer ýchaskesin paıdalaný máselesi qoldanystaǵy zańnamaǵa saı, qoǵam pikirin eskere otyryp jáne áleýmettik baǵyttylyǵyn saqtaı otyryp qaralady, - dedi Marat Sultanǵazıev.
