Atyraý oblysynda túıeler belgisiz indetten qyrylyp jatyr. Maýsym aıynan beri Qurmanǵazy aýdanynda 200-den astam qos órkeshti janýar aýyryp, 84-i ólgen, dep habarlaıdy KTK telearnasy.

Qazir elýden astam túıeni mal dárigerleri emdep jatyr. Biraq veterınarlar munyń ne indet ekenin taba almaı jatyr. Al qoradaǵy maly qyrylyp shyǵynǵa batqan aýyl turǵyndary úkimet tarapynan  qoldaý suraıdy.

"Bıyl túıeler aýyryp, qatty qıyndyq kórip otyrmyz. Sebebi jalǵyz men emes, osy aýyldyq bárinde de túıe ólip jatyr. Aýrýyn taba almaı qatty qınalyp otyrmyz. Meniń bes ana túıe, eki bota óldi. Dárigerler kómegin jasamaı jatqan joq, olar bar kómegin jasady. Biz tek sol malmen kún kórip otyrmyz. Bizdiń aýyldyń tynys tirshiligi tek qana sol mal", - deıdi Fazılá Qabdolova.

Qurmanǵazy aýdanyna qarasty aýyldarda túıeniń bulaı belgisiz indetten ólýi byltyr da bolǵan. Biraq bıyl jaǵdaı órship tur, deıdi sharýalar. Dyńǵyzyl, Eńbekshi, Maqash aýyldarynda mal shyǵyny tym kóp eken. Ólekselerdi ákimdik shetinen kómip jatyr. Veterınarlar synamalaryn Ulttyq referent veterınarıa ortalyǵyna jibergen. Alaıda qaýipti qozdyrǵysh anyqtalmapty. Osylaısha tórt túliktiń tóresi qandaı aýrýǵa shaldyǵyp, qyrylyp jatqany beımálim. Al aýyl sharýashylyǵyna jaýaptylar mınıstrlikke usynys jiberdik dep qol qýsyryp otyr.

"Oblys ákimdigi tarapynan aýyl sharýashylyǵy mınıstrligi, veterınarıany baqylaý jáne qadaǵalaý komıtetine usynys hat joldanyp, osy aýrýdyń naqty neden paıda bolǵanyn anyqtaý maqsatynda arnaıy mamandardy jibertýin suradyq. Endi habar kútip otyrmyz", - deıdi Atyraý oblysy aýyl sharýashylyǵy jáne jer qatynastary basqarmasy, veterınarıa bóliminiń bas mamany Yqylas Azamatov.