Aqkól aýdanynda 14 jastaǵy ulyna ortasha aýyrlyqtaǵy dene jaraqatyn keltirgen áıelge sot úkimi shyqty, dep habarlaıdy bairaqmedia.kz.

Aqmola oblystyq sotynyń málimetinshe, oqıǵa 2024 jyldyń qyrkúıeginde bolǵan. Anasy balasyna ruqsatsyz mýzykalyq kolonkany alyp ketkeni úshin urysyp, sodan janjal shyqqan.

Ashýǵa býlyqqan áıel úıdiń aýlasynda turǵan kúrekti alyp, ulyn qorqytpaq bolyp, ony balasyna qaraı sermep qalǵan. Bala ózin qorǵaý úshin qolyn kótergende kúrek saýsaqtaryna tıip, jaraqat alǵan. 

Saraptama onyń saýsaǵynyń býyn súıegi jabyq túrde synyp, azdap yǵysqanyn anyqtady.

Sotta áıel kinásin tolyq moıyndap, balasyna ádeıi zıan keltirgisi kelmegenin, tek qorqytqysy kelgenin aıtty. 

Aıtýynsha, janjaldasý kezinde uly oǵan beıádep sózder aıtqan.

"QR Qylmystyq kodeksiniń 107-baby 2-bóligi 3 jáne 8-tarmaqtary boıynsha (kámeletke tolmaǵanǵa ortasha aýyrlyqtaǵy dene jaraqatyn qasaqana keltirý) áıel kináli dep tanyldy", - dep jazylǵan habarlamada.

Sot aıyptalýshynyń shyn ókinip otyrǵanyn jáne buryn sotty bolmaǵanyn eskerip, 1 jylǵa shartty túrde bas bostandyǵynan aıyrý jazasyn taǵaıyndady.