Oıyn bıznesi Almaty oblysy ekonomıkasynyń mańyzdy bóligi. Bul sala halyqty jumyspen qamtýǵa jáne búdjetke túsetin kiristerge aıtarlyqtaı yqpal etýde, dep habarlaıdy bairaqmedia.kz

Aıta keteıik, Qazaqstan Respýblıkasynyń «Oıyn bıznesi týraly» zańyna sáıkes, kazıno, oıyn avtomattary zaldary jáne býkmekerlik keńselerdiń qyzmeti Qonaev qalasynyń aýmaǵynda ruqsat etilgen.

Almaty oblysynyń ákimi Marat Sultanǵazıevtiń aıtýynsha, qazir óńirde 5 kazıno, 3 oıyn avtomattary zaly jáne 11 býkmekerlik kompanıa jumys isteıdi. Memlekettik kirister departamentiniń derekterine sáıkes, sońǵy jyldary 15 kazıno óz qyzmetin toqtatqan. Bul jaǵdaı naryqtyq jaǵdaıdyń ózgerýine jáne salyq zańnamasyndaǵy túzetýlerge baılanysty deıdi shahar basshysy. Soǵan qaramastan, oıyn bıznesinen búdjetke túsetin salyq artýda.

Sońǵy bes jylda oıyn bıznesinen túsetin salyqtyq túsimderdiń turaqty ósimi baıqalýda. 2022 jyly memlekettik búdjetke 8,8 mlrd teńge kóleminde salyq tústi, onyń ishinde 500 mln teńge jergilikti búdjetke aýdaryldy. 2024 jyly oıyn bıznesi sýbektilerinen túsken salyqtardyń jalpy somasy shamamen 80 mlrd teńgeni qurady. Onyń ishinde 19,1 mlrd teńge jergilikti búdjetke, 60,5 mlrd teńge respýblıkalyq búdjetke tústi. Negizgi kirister býkmekerlik kompanıalardan qamtamasyz etiledi, - dedi Marat Sultanǵazıev.

Kazınoǵa keletin bolsaq, bul segmentte de ósim baıqalady. Eger 2020 jyly jergilikti búdjetke 385 mln teńge tússe, 2024 jyly bul kórsetkish 1 mlrd teńgeden asqan. Al respýblıkalyq búdjetke túsimder 7,7 mlrd teńgeden 14 mlrd teńgege deıin ósipti. Osylaısha, kazıno qyzmetinen túsetin salyq kólemi eki jarym esege artypty.

Oıyn bıznesimen aınalysýǵa lısenzıa berý jáne olardy uzartý Qazaqstan Respýblıkasy Týrızm jáne sport mınıstrliginiń quzyrynda. Búgingi kúni oblys boıynsha qosymsha kazıno ashýǵa nemese jańa lısenzıa berýge qatysty ótinishter túsken joq. Degenmen, aımaqtyń týrısik tartymdylyǵynyń artýyna baılanysty áleýetti ınvestorlar qyzyǵýshylyq tanytýda, - dep atap ótti Almaty oblysynyń ákimi.