Қостанайда 35 жастағы әйел жол апатынан қаза тапты. Оны көлікпен қағып кеткен жүргізуші оқиға орнынан ізін суытқан, деп хабарлады Bairaqmedia.kz КТК телеарнасына сілтеме жасап.
Қайғылы оқиға 12 қазанда белгілі болды. Таңертең жол жиегінде жатқан әйелдің денесін сол маңнан өтіп бара жатқан жүргізушілер байқаған. Олар тапқан кезде зардап шегуші тіршілік белгісін бермеген.
Белгілі болғандай, марқұм Лисаковск қаласының 35 жастағы тұрғыны болған. Ал оны қағып кеткен белгісіз жүргізуші тоқтамастан оқиға орнынан кетіп қалған. Полиция дереу «Ұстау» жоспарын жариялап, күдіктіні іздеуге кіріскен. Нәтижесінде бірнеше сағаттың ішінде 42 жастағы ер адам анықталып, ұсталды.
Күдіктінің ақ түсті кроссоверінің соққы салдарынан бамперінің бір бөлігі жұлынып кеткені белгілі болды. Қостанай облыстық полиция департаментінің ақпараттық саясат бөлімінің аға инспекторы Екатерина Рабцун оқиғаға қатысты түсініктеме берді.
«Автокөлік Қостанай қаласында қысқа уақыт ішінде анықталды. Күдікті ұсталды. Қазіргі уақытта болған оқиғаның барлық мән-жайы анықталып жатыр», – деді полиция өкілі.
Қазір тергеушілер жол апатының қалай болғанын және жүргізуші оқиға орнынан қашпай, дер кезінде көмек көрсеткен жағдайда әйелдің өмірін сақтап қалу мүмкіндігі болған-болмағанын анықтап жатыр.
