Қызылордада орналасқан табақша шыны өндіретін республикадағы жалғыз инновациялық зауыт жылына 197 мың тонна өнім шығарып, ішкі нарықты толық қамтып қана қоймай, әлемнің бірнеше еліне экспорттап келеді. Шыны өндірісінің басты шикізаты – Арал маңындағы Сарышоқы құмының халықаралық деңгейде мойындалған жоғары сапасы, деп хабарлайды bairaqmedia.kz
Қызылорда қаласында 2022 жылы «Бір белдеу – бір жол» аясындағы Қазақстан–Қытай индустриялық ынтымақтастық жобасы ретінде іске қосылған табақша шыны зауыты бүгінде ел экономикасының маңызды драйверіне айналды. Жылдық қуаттылығы 197,1 мың тоннаны құрайтын кәсіпорын – республикадағы алғашқы әрі жалғыз инновациялық өндіріс. Жобаға 42 млрд теңге көлемінде шетелдік инвестиция тартылған.
Зауыт өнімінің 70 пайызы ішкі нарыққа бағытталса, қалған бөлігі Өзбекстан, Қырғызстан, Тәжікстан, Грузия және Еуропаның бірқатар елдеріне экспортталады. Биыл облыс басшылығының Қытайға сапарынан кейін зауытта қуаттылығы жылына 5 млн шаршы метр энергия үнемдейтін шыны өндіретін жаңа желі іске қосылды. Инвестициялық құны – 15 млн АҚШ доллары.
Orda Glass LTD» ЖШС өндірістік бөлімі бастығының орынбасары Ғалымжан Қуатовтың айтуынша, шыны өндірісінің негізі саналатын құм Арал маңындағы Сарышоқы кен орнынан алынады.
«Халықаралық стандарт бойынша құмның кремний оксиді 95 пайыздан жоғары болуы керек. Біздің зертханалық талдау нәтижесінде Арал құмының тазалығы 99,6 пайызға дейін жететіні дәлелденді. Яғни бұл – әлемдік деңгейдегі сирек кездесетін көрсеткіш. Бір тонна шикізаттың 40 пайызы осы құмнан тұрады», – деді Ғалымжан Қуатов
Құм құрамындағы темір деңгейінің төмендігі де оның артықшылығы. Арал құмында ферум мөлшері – шамамен 0,5 пайыз.
«Темір аз болған сайын дайын өнімнің түсі ашық әрі мөлдір болады. Көрші елдерде темір деңгейі жоғары болғандықтан, олардың шынысы жасыл реңк береді. Ал біздікі – толықтай мөлдір, сапасы жоғары», – деді Ғалымжан Қуатов
Зауыт толықтай заманауи автоматтандырылған қондырғылармен жабдықталған. Еуропалық, америкалық, жапондық және түркиялық машиналар жоғары дәлдікпен жұмыс істеп, сапаны тұрақты ұстап тұрады. Зауыт Қазақстанның жылдық сұранысын толық жауып қана қоймай, өнімінің 30-35 пайызын шетелге шығарады. Еуропалық лицензия негізінде Швейцария, Польша, Эстония, Латвия мемлекеттерімен де жұмыс жолға қойылған.
Кәсіпорында қазір 357 адам еңбек етеді. Оның 55-і – шетелдік мамандар. Жоба басталған кезде олардың саны 160 болған.
«Келісімшарт бойынша шетелдік мамандар жергілікті қызметкерлерді оқытып, олардың үлесі жыл сайын 5-10 пайызға азаюы тиіс. Бүгінде бұл талап толық орындады. Қазір жұмысшылардың дені жергілікті тұрғындар. Оларды тұрақты жалақымен бірге бірқатар әлеуметтік жеңілдіктер қарастырылған. Орташа жалақы 300 мың теңге», – дейді Orda Glass LTD» ЖШС өкілі
Аймақта шыны зауытының базасында жаңа өндірістер ашылуда:
• «Айна Гласс» – жылына 720 мың шаршы метр айна өндірісі;
• «Комфорт-1 KZ» – екі қабатты терезе және шыңдалған шыны жобасы;
• «Достық» ЖК – мультифункционалды әйнек пакеттері;
• «Seven Rivers Technologies» – жылына 240 млн дана шыны бөтелке өндіру жобасы.
Бұл жобалар өңірде толыққанды шыны кластерін қалыптастыруға мүмкіндік беріп, жаңа жұмыс орындарын ашуда. 2025–2028 жылдары аймақта құны 2,7 трлн теңге болатын 90 инвестициялық жоба іске асып, 11 мыңнан астам жұмыс орны ашылмақ.
