«Қазақмыс» корпорациясы басқару құрылымын ауқымды түрде трансформациялауға және кадрлық реформалауға кірісті. Бұл туралы «Қазақмыс корпорациясы» ЖШС басқарма төрағасы Нұрахмет Нуриев Жезқазғанда еңбек ұжымдарымен өткен есептік кездесуде мәлімдеді, деп хабарлайды Bairaqmedia.kz.
Онлайн форматтағы жиынға Балқаш, Қарағанды және Шатыркөл-Жайсаң өндірістік алаңдарының қызметкерлері де қатысты.
Реформа аясында басқарудың екі деңгейі таратылып, Қазақмыс корпорациясының бас директоры және кен-байыту кешенінің бас директоры лауазымдары жойылады.
Сондай-ақ филиалдық жүйе де өзгеріске ұшырайтыны атап өтілді.
Өзгеріс нәтижесінде барлық өндірістік кәсіпорындар технологиялық және географиялық қағида бойынша қайта құрылымдалады. Маусымға дейін компанияның жаңа құрылымында бес дербес өндірістік бөлімше құрылуға тиіс:
- Нұрқазған тау-кен өндірісі;
- Жезқазған тау-кен өндірісі;
- Қарағайлы тау-кен өндірісі;
- Балқаш тау-кен өндірісі;
- Шатыркөл-Жайсаң тау-кен өндірісі.
Әр бөлімшені тәжірибелі басшы басқарады. Оған өндірісті басқару, сатып алу шарттарын жүзеге асыру, сонымен қатар қаржы және кадр саясаты мәселелерін жедел шешу өкілеттігі мен бекітілген бюджет беріледі. Басқарудың жаңа жүйесі әрбір бөлімшеге өндірістік, әлеуметтік және еңбек мәселелерін дербес шешуге мүмкіндік береді.
Жұмыс кездесуі барысында басқарма төрағасы «Қазақмыс корпорациясы» ЖШС бас директоры Олег Копытовқа атқарған қызметі үшін алғыс білдіріп, жаңа жұмыс орнында сәттілік тіледі.
Айта кету керек, компанияда еңбекті қорғау және өндірістік қауіпсіздік бөлімін қайта құрылымдау бойынша ауқымды жұмыс атқарылады. «Қазақмыс корпорациясы» ЖШС өндірістік қауіпсіздік жөніндегі директоры Юрий Гуднин де компаниядан кетеді.
Компаниядағы бас директордың функционалы екі блокқа бөлінеді: біріншісі – негізгі өндіріс: кен өндіру, қайта өңдеу, техникалық қызмет көрсету, екіншісі – геология және барлау, қорларды тиімді пайдалану, кен-шикізат базасын толықтыру және компанияның стратегиялық дамуы.
Осылайша Нұрахмет Нуриев басқарма төрағасының екі орынбасарын таныстырды. Өндіріс бойынша Саят Бакиров, ал геология және даму бойынша Ғалым Нұржанов тағайындалды.
Жаңа құрылымды қалыптастыру аясында өндірістік бөлімшелердің бас директорының міндетін атқарушылар тағайындалды:
- Жезқазған тау-кен өндірісі – Данияр Жаналинов;
- Шатыркөл-Жайсаң тау-кен өндірісі – Жандос Сматаев;
- Нұрқазған тау-кен өндірісі – Мұқан Үңгітбаев;
- Балқаш тау-кен өндірісі – Нұрқанат Ретаев;
- Қарағайлы тау-кен өндірісі – Қайрат Шалмағамбетов.
Өтпелі кезеңде жаңа құрылымдардың басшылары барлық процесті қайта құрумен, өзара тиімді іс-қимылды жолға қоюмен және өндірістің үздіксіз жұмысын қамтамасыз етумен айналысады. 1 маусымға дейін бейімделу кезеңін аяқтап, жұмысты жаңартылған форматқа көшіру көзделген.
