Бүгін 26 наурыздан 27 наурызға қараған түн — Қадір түні, деп хабарлайды Bairaqmedia.kz.

Қазақстан мұсылмандары діни басқармасының төрағасы, Бас мүфти Наурызбай Тағанұлының айтуынша, Қадір түні — қасиетті, тағдыр, тарылу деген мағыналарды білдіреді. 

Алла Тағала Құранда: «Біз шынында, Құранды Қадір түнінде түсірдік. Қадір түнінің не екенін білесің бе? Қадір түні (қасиет және сауап жағынан) мың айдан да қайырлы. Сол түнде періштілер және Жәбірейіл Алланың әмірімен (жер бетіне Алла тағдыр еткен) барлық істерді атқару үшін түседі. Сол бір түн, ағарып таң атқанға дейін амандық-тыныштық түні болады» («Қадір» сүресі, 1-5-аяттар) деп баяндайды.

Расында, Рамазан айының қасиетті болуының ұлы ерекшеліктерінің бірі – Қадір түнінде тағдырдың жазылуы. Ал Қадір түнінің қасиетті болуының мәні – адамзат баласын екі дүние бақытына жетелеуші қасиетті кітабымыз Құранның түсуі, – дейді бас мүфти.

Қадір түнінде жасауға кеңес берілетін амалдар:

- Құран сүрелерін оқу;

- дұға жасау;

- истиғфар айту (кешірім сұрау);

- садақа беру;

- зікір айту (Алланы еске алу) – бұл түнде «Субханаллах», «Аллаху Акбар», «Әшһаду ән лә иләһә иллаллах» деген сөздер жүректерді тазалап, Алланың рақымына жақындатады.