Сауда және интеграция министрлігі дүкендерде сатылымда тұз жоғын айтқан БҚО тұрғындарының шағымына қатысты жауап берді, деп хабарлайды ведомствоға сілтеме жасаған bairaqmedia.kz.

Министрліктің мәліметінше, Батыс Қазақстан облысы халқының ай сайынғы тұзға қажеттілігі шамамен 90 тоннаны құрайды.

Тұздың негізгі көлемі (шамамен 80 пайыз) логистикалық қолайлылыққа байланысты (270 км) Ресей Федерациясының Орынбор облысы Соль-Илецк қаласында орналасқан "Руссольдан" жеткізіледі.

"Руссоль" тарапынан тұз жөнелтудің уақытша тоқтатылуына байланысты облыстың көтерме жеткізушілері қазақстандық зауыттардан жеткізілім ұйымдастырып жатыр", - делінген хабарламада.

Жөнелтудің тоқтатылу себептерін анықтау мақсатында жергілікті атқарушы органдардың делегациясы Ресей Федерациясының Орынбор облысына жіберілген.

Жағдайды тұрақтандыру және облыстың тұзға деген қажеттілігін толық қамтамасыз ету үшін Қызылорда облысындағы кәсіпорындармен келісімшарттар жасалған.

"Өндірушілердің қашық орналасуына (1040 км) байланысты тұз вагондар арқылы жөнелтіліп, 4-5 күнде жеткізіледі.

Қазіргі кезде қазақстандық өндірушілермен жалпы көлемі 300 тоннаны құрайтын 5 вагонға келісімшарт жасалды. Оның ішінде 1 вагон (60 тонна) жолда келе жатыр, ол 30 қарашада келеді.

Қалған 4 вагонның (240 тонна) жеткізілуі 5-7 күн ішінде аяқталады. Алдағы уақытта өңірді үздіксіз қамтамасыз ету мақсатында жергілікті әкімдік тұз жеткізуге арналған келісімшарттар көлемін арттырылады", - делінген министрлік хабарламасында.

Министрлік өкілдері қазіргі таңда жұмсақ қаптамадағы тұз БҚО-дағы бірнеше сауда желісінде шектеусіз сатылып жатқанын, сонымен қатар барлық сауда желісінде "экстра" санатындағы тұздың да жеткілікті қоры барын айтты.