Қазан айында іске қосылған «Қызылорда-нан» кәсіпорны жаңа автоматтандырылған өндірістік кешені бүгінде қаладағы нан өнімдерінің 20 пайызына дейінгі сұранысты қамтып отыр. Зауыт тәулігіне 15 мың дана нан шығарып, әлеуметтік маңызы бар өнімді тұрақты әрі қолжетімді бағамен ұсынуды мақсат етеді, деп хабарлайды bairaqmedia.kz.

Қызылордада биыл қазан айында іске қосылған «Қызылорда-нан» кәсіпорны нан-тоқаш, кондитерлік және макарон өнімдерін шығаратын жаңа өндірістік кешені толық автоматтандырылған жабдықтармен қамтылған. Жоба құны – 5,6 миллиард теңге.

Зауыт тәулігіне 15 мың дана нан өндіреді. Бұл Қызылорда қаласында тұтынылатын нан көлемінің шамамен 20 пайызы. Өнімдердің 30 пайызы кәсіпорынның жеке сауда желісі арқылы сатылса, 70 пайызы қала және маңайдағы дүкендерге жеткізіледі.

«Әлеуметтік нан бағасын мемлекет жіті қадағалайды. Заң бойынша үстеме баға 15 пайыздан аспауы керек. Яғни дүкендерде 90–95 теңге аралығында сатылуы тиіс. Біз жеткізетін нүктелердің басым бөлігінде осы баға сақталады», – «Қызылорда-нан» директоры Ержан Ескендір    

Қазіргі таңда кәсіпорында 120-дан астам адам жұмыс істейді. Барлық қызметкер – жергілікті тұрғындар. Алдағы уақытта жұмыс орындарының саны 170-ке дейін көбейеді.

«Нан – қасиетті ас. Наубайшы болу – үлкен мәртебе. Бұл тазалыққа, тоқшылыққа жетелейтін еңбек. Наубайшылар әрдайым халықтың құрметіне лайық деп ойлаймын», – деді  Ержан Ескендір.      

Кешенге мемлекеттік қолдау ретінде 5 гектар жер телімі бөлініп, қажетті инфрақұрылыммен қамтамасыз етілді. Сонымен қатар, 1,2 миллиард теңге жеңілдетілген несие беріліп, оның пайыздық мөлшерлемесі субсидияланды.

Бірінші кезеңде 3,1 миллиард теңгеге заманауи, толық автоматтандырылған жабдықтары бар төрт өндірістік цех іске қосылды. Алдағы жылы жобаның екінші кезеңінде 2,5 миллиард теңгеге ұн комбинатын салу жоспарланған.