2026 жылғы 31 қазаннан бастап «Отбасы банк» ірі көлемдегі ипотекалық несиелерді рәсімдеу үшін алынатын комиссияның шекті мөлшерін арттырады. Енді кейбір қарыз алушылар 1 миллион теңгеге дейін комиссия төлеуі мүмкін, деп хабарлайды Вairaqmedia.kz банктің ресми мәліметіне сілтеме жасап.
Банктің түсіндіруінше, өзгеріс алдын ала және аралық тұрғын үй заемдарына қатысты. Комиссияның негізгі мөлшерлемесі бұрынғыдай несие сомасының 1 пайызын құрайды. Алайда ірі несиелер үшін оның ең жоғары шегі ұлғаяды.
31 қазаннан бастап комиссия мынадай тәртіппен есептеледі:
50 млн теңгеге дейінгі несиеге – 1%, бірақ 300 мың теңгеден аспайды;
50 млн теңгеден жоғары, 100 млн теңгеге дейінгі несиеге – 1%, бірақ 500 мың теңгеден аспайды;
100 млн теңгеден асатын несиеге – 1%, бірақ 1 млн теңгеден аспайды.
Бұған дейін несие сомасына қарамастан комиссияның ең жоғары мөлшері 300 мың теңге болатын. Мәселен, 70 млн теңге несие рәсімдеген азамат бұрын 300 мың теңге комиссия төлесе, жаңа ереже бойынша бұл сома 500 мың теңгеге дейін өседі. Дегенмен өзгеріс барлық қарыз алушыға әсер етпейді. Банктің мәліметінше, клиенттердің 92 пайызы 50 млн теңгеге дейін несие алады. Олар үшін комиссия мөлшері өзгеріссіз қалады.
Маңыздысы, жаңа талаптар тек 31 қазаннан бастап қабылданатын өтінімдерге қолданылады. Оған дейін тіркелген өтінімдер бұрынғы шарттармен қаралады. Бұрын берілген несиелерге де өзгеріс енгізілмейді. Комиссия несие берілген кезде бір рет қана алынады. Ал мемлекеттік тұрғын үй бағдарламалары аясында рәсімделетін заемдардан мұндай комиссия ұсталмайды.
