Қазақстанда жаңа партия құрылатыны туралы жарияланды. Бастамашыл топ Қазақстанда «Әділет» атты жаңа саяси партия құру ниеті туралы ресми мәлімдеме жасады, деп хабарлайды bairaqmedia.kz.
Мәлімдемеде айтылғандай, жаңа партия прогрессивті реформаларды қолдауға, Әділетті Қазақстан құру идеясына, заң үстемдігін нығайтуға және азаматтардың шешім қабылдау процесіне қатысуын кеңейтуге ұмтылады.
Негізгі мақсат пен міндет ретінде жаңа Конституция қағидаттары мен ел құндылықтарына сүйене отырып, Қазақстан Республикасы азаматтарының құқықтарын, бостандықтары мен мүдделерін қорғау аталды.
«Біз барлық жауапты азаматтардың күш-жігерін біріктіріп, қуатты экономикасы бар, баршаға кең мүмкіндік ұсынатын, әлемдік қауымдастықта беделді орны бар Әділетті мемлекет құру мен нығайтуды көздейміз» деп жазылған мәлімдемеде.
Сонымен қатар партияның басым бағыттары да аталды:
16 сәуірде бастамашыл топ Қазақстанның Әділет министрлігіне тіркеуге дайындық рәсімін бастау туралы өтініш жолдайды және жақын уақытта құрылтай съезін өткізуді жоспарлап отыр.
Бастамашыл топ құрамында «Әділ сөз» халықаралық сөз бостандығын қорғау қорының президенті Қарлығаш Жаманқұлова, «Қазақ тілі» халықаралық қоғамының президенті Рауан Кенжехан, саясаттанушы Марат Шибутов, «Қ.Жұбанов атындағы Ақтөбе өңірлік университеті» КЕАҚ басқарма төрағасы – ректоры Лаура Қарабасова, АХҚО басқарушысы Ренат Бектұров, Бала құқықтары жөніндегі уәкіл Динара Зәкиева, «YNTYMAQ» шағын және орта бизнес қызметкерлерінің қазақстандық салалық кәсіптік одағы Павлодар облыстық филиалының төрайымы Гүлзира Атабаева, саясаттанушы Бөріхан Нұрмұхамедов, «Qazaqstan» РТРК тележүргізуші-журналисі Ирина Тен, «Қазақстан халқына» қоғамдық қоры басқарма төрайымы Ләззат Шыңғысбаева және басқа да тұлғалар бар.
«Қазақ тілі» халықаралық қоғамының президенті Рауан Кенжехан бұл туралы пікір білдірді.
«Достар! Мен жаңа «Әділет» партиясын құру бастамашыларының бірімін. Біздің мақсатымыз – әділетті және баршаға тең мүмкіндік ашатын Қазақстанды нығайту. Біз әр азаматтың үні естілетін, мүддесі еленетін, заң үстемдігі күмәнсіз, білім мен еңбек арқылы табысқа жетуге болатын қоғам қалыптастыруды көздейміз.
Жаңа Конституцияның қабылдануымен Қазақстан өз дамуының жаңа кезеңіне қадам басты. Бұл – келешек үшін әрқайсымыз жауапкершілік алатын кезең. Біз нақты шешімдер ұсынып, оларды іске асыруға білек сыбана кірісуге, ел дамуына үлес қосуға дайынбыз.
Бұл жаңа кезеңнің жаңа партиясы! «Әділет» партиясы – өзгерісті қалайтын және оны ақылмен, жүйелі түрде жүзеге асырғысы келетін азаматтардың таңдауы. Біз бірге әділ қоғам, әлеуеті зор Ел құра аламыз!», деп жазды ол.
