Олжас Бектенов ESTA Construction компаниясымен екі апта ішінде құны 1,3 млрд доллар болатын инвестициялық Келісім жасауды тапсырды, деп хабарлайды Bairaqmedia.kz.
Премьер-министр Олжас Бектенов ESTA Construction компаниясының бас директоры Мұстафа Топракпен кездесу өткізді. Жиында Карбамид пен аммиак өндіретін зауыт құрылысына қатысты мәселелер талқыланды.
Құны 1,35 млрд доллар болатын жоба Маңғыстау облысында, «Құрық» теңіз порты маңында ірі газ-химия өндірісін құруды көздейді. Зауыттың орны Каспий теңізі арқылы өнімді экспорттауға оңтайлы жағдайларды қамтамасыз ету үшін логистикалық артықшылықтарды ескере отырып таңдалды. Зауыт жылына 700 мың тоннаға дейін карбамид және 42 мың тонна аммиак өндіреді, бұл тыңайтқыштар импортына тәуелділікті азайтып, еліміздің ауыл шаруашылығы саласын қосылған құны жоғары өніммен қамтамасыз етуге мүмкіндік береді. Жобаны іске асыру барысында 3 мыңға дейін маман тартылып, құрылыс нәтижесінде 400 тұрақты жұмыс орны ашылады.
Олжас Бектенов өзімізде карбамид өндірісін құру импортқа тәуелділікті азайтуға және азық-түлік қауіпсіздігін нығайтуға мүмкіндік беретінін баса айтты.
«Мемлекет басшысы еліміздің агроөнеркәсіп кешенін дамытуға үлкен көңіл бөлуде. Өткен жылы өнім жинау бойынша рекордтық көрсеткішке қол жеткізілді. Үкімет егіншілерді қолдауға 700 млрд теңге бөлді. Маңызды мәселе – сапалы әрі қолжетімді минералды тыңайтқыштармен қамтамасыз ету. Сондықтан сіздің жобаңыз карбамидке ішкі сұранысты қамтамасыз ету, сондай-ақ оны импорттау тұрғысынан біздің қызығушылығымызды тудырып отыр», – деп атап өтті премьер-министр.
