Бүгін таңнан 7 жасар Айзеренің үйінің алдында адам көп. Жерлеу рәсімінде қара жамылған отбасының туыстарынан бөлек, тілшілер, жедел жәрдем қызметкерлері де жүр деп хабарлайды bairaqmedia.kz

Қайғыдан қан жұтқан отбасы бастапқыда жаназаға тілшілердің қатысуына қарсы болғанымен, кейін бір ауыздан рұқсат берді. Олар екінші сынып оқушысының қазасына кінәлілердің тиісті жазаға тартылуын талап етуде.

Марқұмның туыстарының бірі оның алдынан жылдамдықпен өткен автобус жүргізушісі де кінәлі деп есептейді. Содан қорқып, қыз артқа қарай жүрген дейді ол. Сөйтіп, жүк көлігінің астында қалған. 

Автобус жүргізушісінің жазалануын сұраймыз. Ол өліммен аяқталған жол апатына себеп болды. Жоғары жылдамдықпен жүйткіп келе жатқанынан бала қорқып, артқа қарай шегінді, - деді көзіне жас алған марқұмның туыс ағасы.

Мұндай апат осы жаяу жүргіншілер жолағында бірінші рет болып отырған жоқ дейді жергілікті тұрғындар. 

Айта кетейік, марқұм отбасындағы 4 баланың үшіншісі болған. Яғни, екі әпкесі мен інісі бар екен.

Еске салайық, қайғылы оқиға кеше сағат 12:17-де Алматы қаласының Қарасу ықшамауданында болды. Бұрындай көшесімен келе жатқан Renault жүк көлігі Новое көшесінің қиылысында жаяу жүргіншілер жолағымен өтіп бара жатқан оқушыны қағып кеткен. Бала алған жарақаттарынан сол жерде көз жұмды. Жүк көлігінің жүргізушісі ұсталып, үстінен қылмыстық іс қозғалды. Қайғылы оқиға Айзере Ибраеваның анасының көз алдында болған. Қосымшадан келе жатқан қызын ол жолдың арғы бетінде күтіп тұрған екен.